سيدة تكسر حاجز الصمت عن الختان .... تفاصيل
المدينة نيوز :- «كفاية ختان بنات».. تهدف إلى توعية المجتمع بالأضرار النفسية والجسدية للفتاة نتيجة الختان، بجانب إلقاء الضوء على أن تلك الجريمة ليس لها أي أساس ديني.
ترصد الحملة شهادات لسيدات وفتيات كسرن حاجز الصمت، ورويت حكايتهن مع الختان عبر قصص واقعية في صعيد مصر.
وفيما يلي أبرز تلك القصص:
«ومن كتر النزيف ماتت»
أنا عمرى 24 سنة ومعايا دبلوم، متجوزة وعندى بنت، وأنا باكره الختان لأن له أضرار كتيرة على العلاقة الزوجية، زى البرود الجنسى اللى أنا باعانى منه ولكن الحمد لله جوزى متفهم إن السبب من الختان وعلشان كده مقتنع إننا مش هانختن بنتنا.
ويوم الختان كان يوم صعب قوى علىَّ، وأنا اتفاجئت لأن سيتى قالت لى تعالى نروح عند الدكتور علشان أكشف وأتسند عليكى، ومسكونى واتختنت وكمان من غير بنج ومحصلش نزيف ولا أي حاجة، ولكن قعدت أكتر من أسبوع وأنا تعبانة بالذات لما أتبول.
وفيه موقف كمان تانى شفته مع واحدة صاحبتى، اتختنت وهى في تانية إعدادى وحصل لها نزيف ومن كتر النزيف ماتت، وأنا مش قادرة أنسى الموقف ده أبداً، لأن ماكنش فيه اهتمام حتى إنهم يودوها للدكتور.
وواحدة صاحبتى تانية كانت داخلة أولى ثانوى اتختنت وبسبب الختان عندها عقده من الجواز ولحد دلوقتى مش عايزة تتجوز وكل مايجيلها عريس ترفضه.
المصري اليوم
