مهندسة أردنية شابة تنشر قصتها بعد اصابتها بالسرطان ..

تم نشره الجمعة 06 أيلول / سبتمبر 2019 07:39 مساءً
مهندسة أردنية شابة تنشر قصتها بعد اصابتها بالسرطان ..
صورة الفتاة

المدينة نيوز :- تداول رواد مواقع التواصل الاجتماعي قصة فتاة اردنية شابة تخرجت حديثا من كلية الهندسة بجامعة اليرموك ، اصيبت بمرض السرطان قبل اشهر . 

وبحسب ما تم تداوله فان القصة على لسان الفتاة المصابة والتي تعاني من الام شديدة ووجود تغير كبير في شكلها . 

وقالت القتاة في القصة : انها بانتظار ان يتم اجراء عمليه لها على الرغم من ان الدكتور المراقب لحالتها اخبرها انه لن يقوم باجراء العملية . 

وتاليا نص القصة وفق ما تم نشره عبر مواقع التواصل الاجتماعي : 

بلقيس ب ، ه  ..حآبه أحكيلكم قصتي ، ي ريت تقرأوهآ للآخر
اسمي بلقيس ، عمري ٢٣ سنه ، كملت هندسة كهربآ من اليرموك ، والتانيه ع الدفعه
بالسنة المآضيه بشهر ٣ طلعت عندي حبة تحت لساني ، كتييير زغنونه م اخدت فيها ، بس صاروا سناني الي تحت يوجعوني! واحد ورا التاني! روحي ي بلقيس ع دكاتره واسحبي عصب وشيلي وحطي ع الفاااضي ️ صار عندي كم سن من تحت يتحركوا! ايش فيه!
المهم رحت ع المشفى صوروني بانوراما م بعرف شو بين معهم المهم بعتوني ع عيادة جرآحة الوجه والفكين ، حكوا بدهم يصوروني طبقي ، صوروني طبقي ، حكوا مو باين شي منيح ، رجعوا صوروني رنين ! وبالاخر قرروا يآخدولي خزعه طبعاً أخدولي ياها قبل عيد الفطر بيوم ولو تشوفوا كيف وجهي بأول يوم العيد نازل لتحت الجهة الشمال نازلة لتحت يعني وجهي كان حامل ي محلآ هيك عيد ، المهم الحمدلله ، حكولي نتيجة الخزعه بدها من اسبوع ل ١٠ ايام ، واقعدي ي بلقيس استني ..
اجا يوم الموعد ورحنا ع هالمشفى بس شافني الدكتور كانت ملامحه م بتتفسر حكيتله في شي ! حكالي تعي اقعدي ، قعدني ع كرسي الاسنان وماما قعدت قبالي ، م عليكم بطول السيرة مع انه رح اطول بس المهم حكالي م بخبي عليكي طلع عندك ورم خبيث! سمعت الخبر كانه سمعت اي شي عادي ولا انهزتلي شعره صرت اخد واعطي معه أسأله بينتشر م بينتشر وشو الحل وشو رح تعملوا وكتييير ريلاكس ، طبعا مين الي منهار ! ماما ، صرت اهدّي عليها كان هداك اليوم بالنسبة لأهلي عبارة عن عزا " الله يبعدنا " المهم الدكتور انبسط كتير مني وتفاجأ انه شو هالبنت! بخبرها معك سرطان وبتضحك وبتسأل وبتاخد وبتعطي! الحمدلله م بعرف كيف القوه نزلها ربنا فيني الف الحمدلله روحنا ع البيت والكل عم يبكي وشادد ع حاله وانا عم بلفلف وعم بهدّي عليهم واحد واحد كانت حتجيني الجلطه المهم تاني يوم الصبح برن الدكتور علي من الساعه ٨ الصبح ، كنت برا انا واهلي ، والغريب اني صاحيه نشيطه بس فعليا يومها م نمت وانا عم بصلي وبدعي ربنا
المهم فتحت عليه خط بيحكيلي بلقيس اعطيني البشاره! الورم طلع حميد! كان احلى خبر ممكن نسمعه انا واهلي! دموع الفرح كانت بتجنن للعيله كلها رحت تاني يوم ع المشفى ، شفت الدكتور وخبرني انه لازم اعمل عمليه ، هالعمليه مو سهله ومدتها طويله ، خبرني انه رح يقصولي الفك السفلي ، ويركبولي صفائح معدنيه ، وانه اقل شي مدة العملية ٩ ساعات ،، ابدآ م اكترثت وحكيتله اوك انا معك بس انه الورم يروح هو مو سهل ع بنت بعمري انه تفقد جزء من شكلها! صح؟ وخصوصآ ازا كان بوجههآ يلي هو ببين للعالم! بس فعليآ ولله م زعلت للحظه ، بالعكس كان الشي كتير عادي وقربني من الله جدآ جدآ وكلمة الحمدلله م كانت تروح عن لسآني ولا رح تروح ، عملت العمليه ودخلت المشفى ٤٠ يوم ، وسدقوني صبايا ، بهيك مواقف الحلو فيها انه بتعرفي مين صاحبك من الي مو صاحبك! بتعرفي انتِ غاليه ع مين وقديه انتِ غاليه! والاحلى من هاد كله قربك من آلله قديه بحسسك بأمان وبطمنك وبيعطيكِ سعآده
ناقشت تدريبي بالمشفى ، بالرغم من انه م كنت احكي ، ودكاترة الجامعه اجو عندي يتطمنوا عني ، قديه حلو! وحطولي علامه حلوه ، وصحباتي الله يخليهم كتبولي التقرير يعني ارتحت منه شايفين الحكمه بالموضوع! طلعت من المشفى يوم وقفة عرفة ، يعني لاحظوا أعيادي كيف الحمدلله ع كل شي والي من الله م احلاه
م الكم بطول القصه بس الي عم بصير انه بعد م عملت العمليه طلعت بشكل تاني تماماً ، بنت فقدت فكها السفلي ، وم عندها غير ع الجهه اليمين ٤ طواحين ووحده منهم عقل كمان ي ريت والباقي قصوه ! ورجاني الدكتور شكل الفك لمن قصوه ! سبحانك ي رب م اكرمك ، طالع قطعه وحده وعليها الاسنان ! بس شفت الصورة بحكيله يااااي ولله انكم سفاحين م اشطركم ️ بكل مره بحكيلي انتِ بتصدميني فكرتك رح تخافي ، المهم الجرح عندي م التئم وكل يوم والتاني يقطبوني مره ببنج ومره بدون والحمدالله م كنت احكي أي وكل فريق الاطباء كان مبسوط مني ، شاء القدر وحكالي الدكتور رح نعمللك عملية تانيه حتى الجرح يتسكر وبكرا ، حكيتله بوافق بس بشرط انه تعمللي غمازه بخدي اليسار! عاملين وعاملين اعملولي غماز الدكتور ضل صافن بيحكيلي فكرتك رح تخافي ولا ترفضي
تاني يوم بصحيني من العمليه بيحكيلي بلقيس قومي عملنالك غماز وصااار عندي غمازة ببلاش
ااه نسيت أحكيلكم انه كان وزني ٨٣ وبعد العمليه وبعد م ضليت شهرين بلا اكل وع المغذيات والسوائل وركبولي بربيش بأنفي كنت اكل منه صااار وزني ٥٩ يعني كسبت جسم وغمازه تخرجت بعد م طلعت بشهر ٩ ، كنت لابسه ماسك ع تمي! يعني مميزة عن الكل ما الكم بطول القصه رجعت بعدها بفترة دخلت المشفى ولهلا بالمشفى يعني سنة علاج واكتر بشوي وانا بالمشافي وم قعدت بالبيت ع بعضهم يمكن شهرين او تلات من ايدون للمدينه واخر شي شاء القدر وصرت اتعالج بمركز الحسين للسرطان لانه بعد م بعتنا الخزعات عليه تبين انه الورم عندي خبيث مو حميد بس بالمشفى الاول الاجهزه عندهم تقنياتها مو عاليه ف بين معهم حميد للاسف طلع خبيث
وقت خبروني الاطباء بمركز الحسين انه خبيث برضو الحمدلله الله اعطاني القوه اكتر واكتر وم اهتميت وبرضو اخدت وعطيت معهم وحكيت الحمدلله ع كل شي حكولي بدنا نعطيكِ اشعه ٣٥ جلسه ، اخدت اشعه وكانت اصعب شي صار ، كنت البس قناع ع وجهي وقت اخدها مع انها بس ١٠ دقايق مدة الجلسه لكن ضغط القناع ع وجهي كان اكتر شي بوجع بالحياه .. وطلعت من المشفى وسكننا بفندق انا وماما ١٥ يوم برمضان ونحنا فيه يعني بحياتي م كنت متوقعه اقضي رمضان انا وماما برا البيت بلا باقي عيلتي بس الحمدلله كلها تجاربرح تصير ذكريات ان شاء الله .
الحمد لله مرقت .. قبل هيك كمان عملت عمليات هون بالمركز منها؛
* ضربولي العصب بوجهي بحُقَن حتى ابطل احس بألم لانه كنت احس بألم بلساني وبوجهي ربنا وحده بعلم فيه شي بيشبه النار الي مولعه فيني .. كنت احس بدي اقطع لساني ووجهي تقطيع .. والحمدلله صبرت ركبولي شي برقبتي مشان التنفس وطبعاً م بقدر احكي غير يا انه اضغط باصبعتي عليها او بفلتر يتركب عليها ، وم ننسى انه صوتي تغير ومخارج الحروف بطلت طبيعيه عندي وطبعآ الحمدلله املي بالله كبير انه يرجع كل شي طبيعي
* ركبولي بربيش تغذيه ببطني ، طبعاً وحسبي الله ونعم الوكيل ركبولي ياه لمده ٣ اسابيع وكان مركب خطأ ، مركب خارج المعده يعني كل شي بحطه فيه كان ينزل خارج جدار معدتي ، تعبى بطني سوائل من برا ، والسوائل طلعت عندي ع الرئه ، وكنت م اقدر اتحرك ولا امشي وكنت احكي للدكاتره عن كيمة الوجع الي بحس فيه يحكولي طبيعي غازات ضلك امشي بتتحسني غير لحد م صوروني واكتشفوا انه مركب خطأ ، ورجعوا عملولي عمليه تانيه ركبولي واحد تاني وسحبولي السوائل وخزقولي بطني ٥ خزقات وحطولي برابيش ، م بحكي غير حسبي الله ونعم الوكيل
المهم ضليت بالمركز بحدود ال ٤ اشهر وصرت وحده من العيله لفريق الممرضين واطباء الجراحه والباطنية وفريق الالم يعني صرت دكتوره فوق المهندسه بليزز يعني طلعت فتره صغيره ورجعت دخلت بسبب الالتهاب الاشعه سببتلي انه جرح برقبتي فتح ، والصفائح بينوا منه ولساني صار يطلع منه كمان ومتل م حكيت لماما عم بتجلق عليكي من رقبتي والاهم من هاد كله لمن صوروني بعد الاشعه صورة رنين وطلعت النتيجه انه الف الحمدلله الورم صغر بشكل رهيب الحمدلله انا ببساطه شفت العجب واشيا محد متوقع يشوفها وحكيت الحمدلله ، لهلا داخله المركز ، قررولي عمليه لجنة الاطباء
انبسطت بالبدايه ، حكولي الوجع رح يخف والالتهاب رح يخف والصفائح رح نشيلهم ورح نستأصل اكبر قدر ممكن من الورم يعني كلها ايجابيات حلوه، بس وقت الدكتور حكالي حابه تشوفي كيف شكلك ممكن يكون بعد العمليه حكيتله اه! ورجاني صورة لشب الورم بلسانه كان بس قاصينله الفك السفلي تماماً ! الشكل اكتر من مرعب صبايا صح شكلي هلا مو طبيعي بس كمان عندي فك سفلي من الصفائح!
بحكيلي الدكتور م حيكون الك فك سفلي ابداً! ولا رح نحطلك صفائح! ودقن م في! وطواحين وأسنان م حقدر ازرع! إلا لبعد سنتين لحتى يتأكدوا انه الورم م رجع ولا انتشر بالبدايه كانت صدمه الي صرت ابكي واضحك بس بعدين صرت افكر بمنطقيه وانه ايجابياتها اكتر وصليت استخاره ووافقت ..
يوم التنين الي مضى اخدولي خزعه الاطباء لشي طالع تحت الجلد ورا راسي هيك متل الحبوببس ع انصح شوي .. حكولي بدها اسبوع ل ١٠ ايام لتطلع .. ويوم التلاتا عملت رجعت عملية حقن للعصب مره تانيه لانه الوجع لا يطاق ولا يستحمل ببساطه وفعلياً جبال م بتتحمله لكن الحمدلله ع الصبر والثبات والقوه ، عم باخد جرع مورفين وكيتامين ولاريكا للي بعرفهم " مخدرات " بالهبل وكل ساعه وبالوريد ولزقات مسكنه ع جسمي لاه بطلت اقدر ابلع حبوب وع الفاااضي!
وللعلم م بقدر ابلع ولا اكل ولا احكي بسبب الفتحه الي برقبتي واي شي بشربه عم ينزل منها متخيلين قدرة ربنا! بغض النظر عن وجع الراس المستمر
واكلي كله من بطني عن طريق البربيش ، وازا اشتهيت شي ها ازا اشتهيت بشربه من تمي عن طريق اسرنج ومع ذلك بينزل من الفتحه ، غير انه بغير عليها ٣ مرات باليوم ! عم بعاني صبايا معاناه ربنا وحده بيعلم فيها ، اكيد انا انسانه بشتهي اكل اشرب احكي اتصور اعيش حياه طبيعيه! صح! ومع هيك راضيه كل الرضى بقضاء ربنا وقدره وعندي امل كتيير كبير بإنه ارجع بلقيس زمان مع انه الدكاتره عم يحاولوا يفقدوني هاد الامل واكتر شي بسمعه منهم انه املك بالله م بفيدك هلا خليه لبعدين، متخيلين الحقاره! مش مهم
امبآرح بيجي لعندي الدكتور الي كان متفائل بانه يعمللي العمليه بيحكيلي انا بعتذر منك بلقيس م رح اقدر اعمللك العمليه وح تضلك هيك ع طول ،، ليه شو صار؟ طلعت نتيجة الخزعه ، استعجلنا فيها وللاسف طلعوا عندك من نفس الورم تحت الجلد برقبتك وبوجهك ، وهيك صعب جدا نعمللك العمليه ، وازا حاولنا نسكر الجرح برقعه رح تموت لانه ممكن الورم ينتشر عليها ، ونحنا هاد الي مبين علينا من الورم الله اعلم وين انتشر كمان ، وقد م استأصلنا رح يضل في اورام نحنا مو مبينه علينا لا بعيوننا ولا بالصور ، حكيتله دكتور انت حكيتلي انه النوع الي عندي والي اسمه ساركوما م بنتشر وانحصر عندي بنفس المكان وصغر كتير من الاشعه شو الي تغير ! بيحكيلي يمكن بسبب الاشعه تولدت عندك خلايا سرطانيه حولين الورم الاصلي وعاشت وانتشرت! يعني دكتور هيك الاشعه ضرتني اكتر م فادتني! هز بكتفه وحكالي م بعرف كانت صدمه تانيه الي ، م بكدب انه بكيت ، ولاول مره بحس انه انا خلص وقفت الحياه بوجهي! وكل شي عم بجلم فيه خلص مات! شو اضل طول عمري هيك ! في فتحه برقبتي واضل اغير عليها وشو م اشرب بنزل وم بقدر اكل وشكلي مش طبيعي وغير الوجع ايش اعمل انا! حكالي م في حل ، رح تضلك هيك
والنوع الي عندك بمراحل متقدمه ، والعمر اله مش طويل ع اساس الاعمار بايده !
طلع الدكتور من هون وماما انهارت ، كنت ابكي ، بس وقفت حالي وحكيت انا كل لحظه بدعي فيها انه ي رب دبر اموري وموكلتك ومفوضه امري لالك وتولاني ي رب واختارلي الافضل دايمآ شووو من كان ! والحمدلله ع كل شي ، ف اكيد ربنا مرتب اموري وهو ارحم فيني من حالي ! اكيد ربنا اله حكمه ! يمكن لو دخلت العمليه م كنت ح اطلع منها! يمكن كنت رح اتشوه! يمكن كنت رح افقد صوتي! ويمكن ويمكن ويمكن! ربنا اعلم بكل شي واكيد رايدلي الخير ، حتى لو اضل هيك ، ربنا يحيي العظام وهي رميم ، يمكن يحيي عظامي وينبنى الي فك وتتسكر الفتحه الي برقبتي من حالها بلا حاجه للاطباء ، رجعت قوّيت حالي بعد م حسيت للحظه انه ضعفت لانه مو بلقيس الي بتضعف ، دعائي دايمآ ي رب اعطيني القوه والصبر والثبات ، وربنا بعد هالصبر هاد كله اكيد م رح يخذلني! اكيد رح يعوضني وازا مو بالدنيا بالاخره! والله ازا بحب عبد ببتليه ، وانا كتيييير مبسوطه انه الله ابتلاني لانه كله باذن الله تكفير عن الذنوب! والحمدلله انا حاسه حالي هلا قريبه من الله اكتر من اي شخص تاني ، ونظيفه من جوا ونيتي صافيه تجاه الكل ، تغيرت للاحسن وبعمري م توقعت اكون حد قوي بهالشكل بلقيس صح فقدت جزء من شكلها بس كسبت كتير ، واحلى شي صار انه كسبت محبة الناس الي هون وبكل مكان وتركت اثر طيب م بينتسى ابدآ ، بعمري م فكرت بالموت لانه الاعمار بإيد الله ..
بعمري م فكرت بالشكل لانه شو من كان الواحد حلو الا م يطلع عالم م بيعجبها العجب ،، اهم شي تكوني راضيه انتي عن حالك ومقتنعه انك حلوه من جوا ، والاهم من هاد كله رضى ربنا ، ولله م بتكوني مبسوطه غير وانتِ قريبه من الله
م بحكي هيك لاني مريضه بس فعليا عن تجربه ، سعادتك بتكون وانت مع الله لأنه الله حيكون معك خطوه بخطوه ولحظه بلحظه ، القران م تهجريه حتى لو المعوذات كل يوم ، وغير هيك م حد ع راسه خيمه ممكن يصيرلك اي شي بلا سابق انذار ، بس الي بدي احكيه انه شو من صار شو من صار احكي الحمدلله رب العالمين ع كل شي دايمآ وابدآ وارضي ارضي ارضي بكل شي بصيرلك ، وعمره الجمال م كان بالشكل ، بالروح وبس
اسفه طولت عليكم بس هاي قصتي وحبيت اشاركها معكم وهاي انا بالصورة ، حطيتها حتى ازا خطرت ع بالكم ملامحي تدعولي بالشفاء التام من ربنا وهلا ادعولي من قلبكم الله يشافيني ويعافيني بقدرته وبمعجزه من عنده ، وان شاء لله ي رب م بحتاج للاطباء لانه كلهم وسائل وربنا الشافي وادعولي الالم يخف او يروح تماماً لانه مش قادره عنجد ، او احكيلكم لا قادره لانه لا يكلف الله نفسآ الا وسعها بس عنجد بتوجع وحيآت ماما ادعوولي مشان الله وازا في حد سمع بتجربه متل هيك يحكيلي



مواضيع ساخنة اخرى