بالفيديو : رسالة من ممرض في مستشفى حمزة يتعامل مع مصابي كورونا
المدينة نيوز :- وجه الممرض بلال فرج رسالة للأردنيين حول فيروس كورونا .
وتاليا نص الرسالة مرفق بفيديو يوضح ماذا يرتدي الممرض الذي يتعامل مع المصاب في مستشفى الامير حمزة :
هيك بلبس لما اتعامل مع مرضى مصابين بفايروس كورونا خوفا من نقل العدوة لنفسي
و بما انك مستحيل تلبس هيك لما تطلع تشتري خبز و ما بتقدر تلبس هيك لما تروح على الدكان و ما بتقدر تلبس هيك لما تطلع من البيت و تزور صحابك قرايبك
عشان هيك!! .. #خليك_بالبيت
لانه اي لبس غير هيك و خالطت مصاب فبتقدر تعتبر حالك صرت مصاب .. و الاعراض ممكن بعد ١٤ يوم لتبين عليك .. بهدا الوقت بتكون عديت امك و ابوك و زوجتك و ولادك و خوانك و .. و في منهم مناعتهم ضعيفة و وقتها بتصير تقول يا ريت حد خبرني ..
عشان هيك بدنا نعيد و نزيد اذا بدك تطلع برة البيت:
اطلع فقط للضرورة القصوى
وابعد مترين على الاقل عن اي شخص موجود بالشارع
ما تفوت محل و في زحمه
حد قرب عليك ابعده عنه و قوله يبعد عنك مترين
و لما ترجع اترك حذائك خارج المنزل
اغسل ايديك و وجهك لمدة ٢٠ ثانية على الاقل بالصابون او الافضل اتحمم بكون احسن
عقم محفظتك
عقم مفاتيحك
و اغسل اواعيك لحالهم على درجه حرارة عالية
عقم كل الاغراض قبل ما تفوتهم لاهلك
و ادعي انه ما تكون لقطت الفايروس ..
اذا شفت كل الناس بالشارع ما بتعمل هيك مش معناته هم الصح .. انت الصح و ما تتنازل و لا تتهاون بصحتك و بصحة عيلتك ..
ارجوكم التزموا
فيديو :
