فنان مصري يعلن إصابته بـ"كورونا" وهذه آخر أمنياته

المدينة نيوز:- كشف الفنان المصريي محمد صلاح عن إصابته بفيروس كورونا المستجد، ودخوله مستشفى صدر العباسية في القاهرة.

وكتب صلاح عبر صفحته الخاصة على "فيسبوك": "بكتبلكم وأنا على سريري في مستشفى صدر العباسية وبعد عمل أشعة مقطعية على الصدر اللي أكدت اني أصيبت بالوباء اللعين وقالولي اتأخرت ليه".

وأضاف: "يمكن تكون آخر كلمات ليا في الدنيا دي .. اترددت كتير بس لقيت نفسي مش قادر وبكتب .. لاني حسيت احساس غريب حسيت اني مش خايف من الموت .. انا خايف اني اموت قبل ماشوف النجاح .. استغربت وقولت لنفسي انت مش خايف من الموت ؟؟؟ قولت والله لا .. انا خايف اموت قبل ماشوف نجاحي .. بلدنا بقى الحلم فيها .. انك بس تشتغل .. انت بس بتحاول طول الوقت انك تشتغل .. وتخبط على البيبان وكل البيبان بتتقفل في وشك".

وتابع: "شباب في أول عمرهم وشباب بقوا رجال ورجال أصبحوا كهول وبنات وسيدات موهوبين خريجين المعاهد والكليات الفنية وماوقفوش أمام كاميرا.. واللي هاجر واللي اكتأب واللي انتحر.. اجمل مافي الوجود الحلم والطموح واقبح مافي الوجود عدم تحقيق الحلم أو الطموح ده".

ووجه رسالة للمنتجين قائلاً: "ارجوكم يا اصحاب الاختيار في شركات الإنتاج من المخرجين ومساعديهم او مديري الإنتاج أو المنتجين الفنيين او المشريفين على الانتاج او أصحاب الورش الفنية أو الكاستينج دايريكتور أو صاحب المنتج الفني أو أو .. الموهوبين في مصر كتير واللي ضيعوا عمرهم في حب الفن ودراسته سنين كتير لكن معندهمش واسطة ولاصاحب ولا قريب مخرج ولا منتج ولا منتج فني ولا ابن نجم برضه كتيير قوي".

واستطرد: " انا كل اللي بتمناه العدل .. أن الموهوبين دول ياخدوا فرصة من الفرص الكتيييير قوي دي .. معرفش ازاي ممكن يتحط النظام .. اللي بيه كل الموهوبين الدارسين أعضاء نقابة المهن التمثيلية ياخدوا فرصة .. واللي يثبت نفسه يكمل واللي مايثبتش نفسه الجمهور هايقول عليه لا .. بس بعد ما يكون اخد الفرصة".

واقترح صلاح فكرة قائلاً: "فكرت ولقيت ان انسب حل .. وانا يمكن ماحضرش تنفيذه أو حتى الموافقة عليه .. هو عمل بروتوكول ملزم بين الدكتور اشرف ذكي بصفته نقيب فنانين مصر ورئيس اكاديمية الفنون المصرية .. على فكرة اكاديمية الفنون في امريكا هي اللي بتمنح جائزة  لاوسكار ..والأستاذ تامر مرسي بصفته رئيس مجلس إدارة الشركة المتحدة للخدمات الاعلامية اكبر وأهم شركة انتاج في الشرق الأوسط".

وختم: "وطبعا بعد كده ممكن كل شركات الانتاج والمخرجين يمضوا ويفعلوا نفس البرتوكول واللي لازم الجميع يتفق على بنوده و صياغته وانا عندي ثقة كبيرة في كل القائمين على هذه الصناعة الكبيرة والعظيمة وفي قائدنا الحكيم المخلص السيد #الرئيس_عبد_الفتاح_السيسي اللي اكيد هايرحب بالعدل أو شكل من أشكال تحقيق العدالة .. ويارب لو اتحقق الحلم ده .. وكنت يعني لاقدر الله مت ابقى مت وانا مستريح وسيبت لاولادي مايفخروا بيه".