حقيقة عودة أسما شريف منير لطليقها الأول
المدينة نيوز :- التقت الإعلامية المصرية أسما شريف منير بطليقها الأول محمود السكري ووالد ابنتها لارا، ونشرت مجموعة من الصور التي جمعتهم رغم انفصالهما لسنوات. وأثارت منير العديد من التساؤلات بين الجمهور حول حقيقة عودتها إلى طليقها مجددًا، لترد عليهم عبر رسالة مطولة نشرتها على إنستغرام قالت فيها إن سبب هذا اللقاء يعود لرغبتها ووالد ابنتها لارا في علاقة طبيعية تساعد ابنتهما على رؤية كل من والديها بشكل طبيعي رغم انفصالهما. وأضاف الإعلامية المصرية أنها لا تفكر في العودة لطليقها الأول، مشيرة إلى أن علاقتهما الآن أفضل من السابق.
وكتبت أسما: “موضوع النهاردة هو اني وابو بنتي قررنا ننزل نخرج عشان لارا كان بقالها كتير مشافتناش في مكان واحد، مشافتناش في كدر واحد مع بعض، ولأ احنا مش هنرجع لبعض و لا مش بنفكر خالص في كده، لان احنا دلوقتي في وضع احسن بكتير، يعني لما كنا مع بعض قررنا اننا منكملش لكن دلوقتي هنفضل في حياة بعض لاخر يوم في عمرنا عشان لارا هتفضل ربطتنا لاخر العمر، بنحترم بعض و عملنا معادلة من أصعب المعادلات في الدنيا و أنا فخوره بينا جداً”.
وأضافت: “بلاش محاكم، بلاش نقول كلام وحش لاولادنا عن بعض من كتر الغيظ، بلاش اب يقابل بنته في نادي بوقت، والله العظيم كله بيخسر و أولهم ولادنا اللي ملهمش ذنب في اختلافنا، التحضر في الموقف ده بيحافظ علي نفسية طفل يا يطلع سوي يا يطلع معقد، زي ما الأم بتخاف علي أكل و شرب و نوم و صحة ولادها والله نفسيتهم أهم من اكلهم و مصارفهم، حتي لو في بينكم بلاوي، بدل ما تحاربوا بعض، اختاروا السلام و خلي كتفكم في كتف بعض عشان الغلابة اللي ملهمش ذنب دول..خدوا خطوة النهاردة عشان قسماً بالله هترتاحوا بقي العمر، شكراً ابو لارا”.
وتابعت: “كتير اتقال لي متتكلميش، دي حياتك الشخصية، انتي بتتاجري بحياتك الشخصية ليه؟، خليكي في الميك اپ و حاجات البنات، امسحي الپوست ده، بلاش ملوش لزمة الكلام في الموضوع ده..و عشان كل ده ضد اعتقاداتي و اللي أنا مؤمنه به كنت بحس إني محبوسه في قالب مش بتاعي، أنا بحب اقول اللي حساه و اعبر عن نفسي و اساعد غيري من خلال تجارب حياتي”. ولفتت: “أنا المتابعين ليا النسبة الأكبر ستات و دي في حد ذاتها معادلة صعبة عشان ست زيك تثق فيكي و في ارائك و متغيرش منك مش بتحصل كتير، وعشان انا أول ما اتعرفت كان من خلال تجربة طلاقي الأولى، وصلت لقلوب ستات كتير و كسبت ثقتهم و ده كان الدافع الاساسي اني اقدم محتوي يفيدهم، كلمة مؤثر مش كلمة سهله و لازم تبقي علي اساس و لازم ابقي قد اني ابقي شخصية عامة و افيد غيري. مش كل الناس قد انها تبقي جريئة و ليها صوت”.
وأوضحت أسما شريف منير على استمرارها في التعبير عن أهم الموقف في حياته خصوصا مع شعورها بالتأثير الكبير على تيار واسع من متابعيها فكتبت: “في ناس بتختار تصدر حاجات ممكن تبقي مش حقيقة بس عشان تتحب و تبان انها شخصية متحققه و سعيده و مسيطرة، و تخاف تقول آرائها لحسن تخسر، انا بقي مش كده، انا عرفت إني ليا تأثير ايجابي علي ناس كتير، انا ليا اثر و رأي و بيتابعني ٢ مليون شخص، ده رقم لو شفتوا علي الحقيقة ممكن يغمي عليا، لما اتكلم عن تجربة في حياتي و تساعد ناس تتقدم او تتخطي موقف صعب او تغير تفكيرها بيحسسني بسعادة و نجاح ميتوصفش، فا انا مش هبطل اتكلم و اقول كل اللي جوايا رغم ان في ناس هتفضل فهماني غلط، بس اللي بيفهمني صح هما اللي هفضل اتكلم عشانهم و اساعدهم و اطور من نفسي عشان افيدهم، عفويتي هي سر نجاحي”.
يشار إلى أن أسما شريف منير قد أعلنت انفصالها عن طليقها الثاني الفنان محمود حجازي في شهر أبريل الماضي، ولم تكشف الإعلامية المصرية أي تفاصيل عن سبب هذا الانفصال، كما أن أسما شريف منير منذ انفصالها عن زوجها الأول محمود السكري وهي تحافظ على علاقة قوية بينهما حيث ظهر الأخير مع طليقها الثاني محمود حجازي في العديد من الصور.
