قل ولا تقل لزوجتك ...
المدينة نيوز - "اللبس ده كش مش كده ؟!" قال أيه عايز توضح لها ان جسمها اتغير وتخنت ، اكتر حاجه تقتل الست ان حد يقولها ان جسمها اختلف بعد الجواز .
"ايه ده عندك شعره بيضا" تخيل احساسك لو حد في الشارع قالك على فكرة انت هتصلع ، احساس بايخ ، هو ده شعور الست لما تقولها انها داخله في طور العجز .
"البنت دي جميلة جداً" مهما كانت البنت اللي قدامك جميلة أياك تقول الكلمه دي بصوت عالي ، الطبيعى انك تبصبص بس اللي مش طبيعي انك تقول الكلمه دي بصوت عالي .
"خطيبتي اللي فاتت كان عمرها ما هتعمل كدة" اياك ان تقارن بين خطيبتك القديمة ومراتك ، المفروض انك نسيت الماضي خلاص وبتكمل حياتك يبقى ليه بترجع للماضي ؟!
"صاحبتك دي غبية" مش من الذكاء انك تطلق احكام على اصحاب مراتك ، احترم اصحاب مراتك زي ما بتحترم مراتك بالظبط ، وان شفت حد من اصحابها بيستغلها فهمها بالمنطق ومترميش اتهامات .
"ليه بتحبيني ؟! انا مش مناسب لواحدة في جمالك" البنت بتحب الراجل الواثق من نفسه وانت بكلامك ده بتهز ثقتك في نفسك قدامها .
"لو كنتِ بتحبيني مكنتيش تعملي كده" ما تحطش شروط لحبك ، اطلب اللي انت عايزه بشكل مباشر ، وده هيقربك منها لانك صريح .
"انتِ عاملة زي امك بالضبط" هتدفع ثمن الكلمة دي ايام وليالي من العياط والنكد .
"مش عاجبني اللي انتِ لابساه ده" اكيد اللي لابساه عاجبها والا مكنتش لبسته ، فاياك تشكك في ذوقها ولو عايز تقول رايك يبقى باسلوب لطيف .
"انتِ عملتي ايه في شعرك ... يععع" الستات بتحب تجرب كل حاجة ، بلاش تسمم بدنها بكلام وحش لان هي كمان ممكن تكون مضايقة من تجربة أنت عملتها ، خليك لطيف .
"انا اقدر اعمل اي حاجة احسن منك" الكلمة دي وحشة جداً وبتبين لها انها قد ايه ضئيلة ومتعرفش تعمل حاجه من غيرك .
لو مراتك سالتك "شكلي عامل ازاي في الفستان ده؟!" ما تقولش زى دبدوبة التخينة .
لو مراتك كلمتك عن عيد جوازكم ، ما تقولش هو امتى؟!
لو مراتك سالتك والفرحه بتتنطط في عنيها "فاكر زي النهارده حصل ايه؟!" اوعى تقولها مش فاكر ، حاول تخرج من الموقف بحنكه ، متبقاش صريح قوي كده .
لو سالتك مراتك "هتجيبلي ايه في عيد ميلادي؟!" متردش عليها وتقول انا عارف هجيب لك ايه خلاص .
لما مراتك تسالك "ليه مجبتليش الهدية اللي قلتلك عليها؟!" ميكونش الرد اصلي نسيت .
لما مراتك تقول لك "يلا نخرج" متردش وتقول ليه نخرج ونلبس ونتعب نفسنا احنا نقعد وانا هعمل لك فشار .
لو مراتك قالت لك "الممثلة دي امورة" متردش وتقول "ايوه" هتتندم ، قول لها مش اجمل منك يا حبيبتي .
لو اكلت مع مراتك في بيت تاني غير بيتكوا اياك تشكر في الاكل لان المفروض ان اكلها اطعم اكل في الدنيا .
لو مراتك اهدتك ميداليه حطها في عنيك ، لان لو ضاعت جوازتك هتبوظ .
متحاولش تتكلم عن مامتها بطريقة وحشة حتى لو هي نفسها بتكره مامتها .
لو لقيتها بتتكلم في التليفون كتير سيبها لان فواتير التليفون ارحم كتير من اللي ممكن يحصل لك ومن الكلام اللي هتسمعه منها .
لو مراتك سالتك بعد الجواز "هو انا اتغيرت" اياك تجاوب وتقول لها "ايوه" ده كده غباء منك ، انما قول لها "اتغيرنا يا حبيبتي انا بقيت وحش وانتِ بقيتي احلى" .
لو انت شايف ان "توم كروز" واد سيس خلي رئيك لنفسك .
متقولش ابدا ان اكل مامتك وحشك ، لان الليله دي هتقضيها عند مامتك .
لو مراتك سالتك عن فستان واحدة في حفلة كنتم فيها اعمل عبيط وقول لها "انا مشفتش حد غيرك في الحفلة ياحبيبتي" .
شخيرها زي صوت الموسيقى في ودنك افتكر ده كويس قبل ما تحاول تعلق على شخيرها .
ابنكم المولود حديثاً هو الوحيد اللي يقدر يحدد امتى تقدروا تقعدوا قاعدة حلوة مع بعض .
احتفظ بتخيلاتك عن الجواز اللي فضلت تحلم بيها قبل الجواز لنفسك .
(انترنت)
