(كرسيفون)

خرج متوتّراً متمتماً من بوابة وزارة الصناعة والتجارة، قاطعاً الطريق باتجاه فرشة ''الكعك ببيض'' في الزاوية المقابلة دون أدنى انتباه للسيارات أو المارين..وضع أوراقه المحفوظة بملف بلاستيكي تحت إبطه ثم اخرج ''جزدانه'' وهمّ في طلب ''كعكه''..تفاجأ بوقوف أبو طايل أمام ذات ''فرشة الكعك''..فأصر على المحاسبة عن ''كعكتين''...

ابو طايل: شو مسرّيك على عمّان...؟؟.

ابو يحيى: يا رجل اشي بعوف الصباح!!.

ابو طايل: خير؟!!.

ابو يحيى: بتعرف انا من زمان عندي هواية الاختراع والطقطقة!!.

ابو طايل: خابر..شغايلك كلها مراقع فقّس..!!.

أبو يحيى: اجيت هون اسجّل براءة اختراع..وما حدا رضي يسجل لي.. شكلهم خايفين!!.

أبو طايل: منك ولا من اختراعك؟!!.

ابو يحيى: من اختراعي طبعاً!!.

ابو طايل: ليش شو مخترع يا قاروط؟!.

ابو يحيى: بتعرف انه في بعض المسؤولين صار لهم قاعدين على الكرسي.. تسع، عشر، احدعشر، قول اثنعشر سنة.. وما بيرضوا يقوموا عنه لو شو ما حاولنا معهم، ولو شو ما كان السبب...

ابو طايل: ايوه وبعدين..

ابو يحيى: قلت بما انها خربانة وخربانة، وبحبوا الكرسي هالقد ومتنتحين فيه، اخترعت لهم كرسي مع سيفون، سميته''كرسيفون''..مشان حتى قومة ''الحمّام'' - حيشا السامعين- ما يقوموها...


ahmedalzoubi@hotmail.com