لمّا بنت تسأل فى المترو عن محطة مبارك

  المدينة نيوز - استعاد المصريون كامل طاقتهم فى ابتكار نكات جديدة مع انفجار ثورة 25 يناير، ومازالت توابع زلزال النكات مستمرة.
أحدث موجة «تسونامى نكت» جاءت على موقع فيس بوك، تحت عنوان «تبقى أنت أكيد فى مصر»، وكلها بلا استثناء «قفشات سياسية» تعلق على ما جرى، وما يجرى:

• لما تلاقى أمن الدولة عارف صاحبتك سابتك ليه، وإنت لسه متعرفش.

• لما مصر ممكن تصدر الثورة للصين، وتستورد منها العلم المصرى.

• لما بعد الثورة ماكدونالدز يديك مع الهابى ميل علم مصر.

• لما الزمالك يكون أول الدورى وتحصل ثورة ويتلغى الدورى.

• لما يبقى الأهلى فاز 5 وهيلعب فى بطولة أفريقيا وما حدش بيتكلم عن الكورة.

• لما تلاقى واحد عاش طول عمره معارض ويبقى رئيس وزراء.

• لما تسمع عصام شرف فتتحول من معارض شرس لمدافع عن النظام.

• لما كل وزارة تعمل صفحة على الفيس بوك.

• لما نجم الجيل يطلع عصام شرف مش تموووورة.

• لما البنت بدل ما كان حلمها أحمد حسن علشان بيحط جيل فى شعره دلوقتى بقى عمرو حمزاوى اللى عمره ما غسل شعره.

• لما يبقى من مواصفات العريس لأى عروسة إنه يكون راح التحرير ووقف فى اللجنة الشعبية.

• لما فى خطبة الجمعة الخطيب ينادى: أيها المسلمون والأقباط.

• لما البابا شنودة يقول للأقباط بلاش مظاهرات فينزلوا التحرير ويعملوا قداس.

• لما تامر أمين يبقى لسه مذيع فى «مصر النهارده» وبيتكلم عن الحزب الوطنى.

• لما يبقى أحمد عز محبوس جوه السجن لكن فلوسه بره.

• لما حسنى مبارك يبقى قاعد مأنتخ فى شرم الشيخ والحراسة عليه أكبر من الحراسة اللى كانت عليه وهو رئيس.

• لما الناس تخرج فى ثورة علشان تزود مرتباتها، والشرطة تقتلهم، وبعدين مرتبات الشرطة هى اللى تزيد.

• لما يبقى حبيب العادلى قتل وعذب المصريين لمدة 14 سنة ويدخل المحكمة والعساكر والضباط بيعملوا له تعظيم سلام.

• لما صفوت الشريف يقرر يعمل حزب شبابى جديد، وزكريا عزمى لسه رئيس ديوان رئيس الجمهورية.

• لما فتحى سرور يطلع يقول: أنا بحاور الشباب على فيس بوك.

• لما مصادر تكشف عن المفاجأة التى قال محامى مبارك إنه سيفجرها الأحد القادم، وهى أن مبارك هيرشح نفسه فى 2011.

• لما أى حد يلبس تيشيرت عليه لوجو أسد يبقى ماسونى.

• لما الشعب يبقى فى عيون مبارك إما إخوان أو مدسوسين أو أجندات.

• لما تبقى أسعد واحد فى الدنيا بعد عمر سليمان ما يقول لك يا أجندة.

• لما ثلاثة أرباع الشعب المصرى يكونوا بيحبوا عمرو موسى ويطلع يعك فى الساقية.

• لما دبابة تتحول كوشة وعريس وعروسة فوقيها.

• لما يكون معاك جواز سفر مصرى والأجانب يصقفوا لك فى المطار.

• لما تكره بلدك قوى وبعد كم يوم تحب تموت علشانها.

• لما بنت تسأل فى المترو عن محطة مبارك، وبعدين ست كبيرة تبتسم وتقول لها: مفيش محطة بالاسم ده، أكيد تقصدى محطة الشهدا.(الشروق)