من الأزغر إلى الوسطاني إلى الكبير ..
مرة ولد زغير ..قال لأخوه الأكبر منّو ..يا خيّي أعطيني ( شلن ) ..فقال له أخوه الأكبر : والله ما معي ..بس ولا يهمك رح أشوف أخونا الأكبر ..خلّك على بين ما أرجعلك ..!! راح الأخو الكبير على الأخو الأكبر وقال له : مشان الله ( بريزة ) عشان أخونا الأزغر بحاجتها ..فقال له : والله ما معي ..بس ولا يهمك رح أشوف أمنا ؛ بلكي على الله ..خلك لحد ما أرجعلك ..!!
راح الأخو الأكبر على أمه وقال لها : يا يُمّا ( رُبع ليرة ) عشان أخويا الوسطاني بدو يعطيها لأخويا الأصغر ..وأنا انحرجت ..!! حضنته الأم و قالت : والله يا بنيّي ما ينعز .. والله ما معي ..بس ولا يهمك رح أشوف أبوك ..وآخر الليل أطلبهن منو ..!!
بعد سهرة مع الأب ..قالت الأم : ابنك الكبير أحرجني ..طلب دينار و ما معي أعطيه ..بدّو إيّاه عشان أخوه الوسطاني طالب منو أخوه الزغير ..شمطها كفّين ..وتندم ..وقاللها : والله ما معي ..بس ولا يهمك رح أشوف أخويا الوسطاني ( عم الأولاد ) ..!!
راح الأب على أخوه الوسطاني وطلبه قرظة عشر ليرات لأنو أم العيال طالبتهن منّو ..والأولاد كلهم يستنوا فيه ..!! تنهد أخو الأب الوسطاني وقال وهو يسحب نفس أرجيلة : والله ما معي ..بس ولا يهمك رح أشوف أخونا الكبير ..أكيد معو ..!!
راح أخو الأب الوسطاني على أخو الأب الكبير ..وقال له : بدي منك خمسين ليرة ..لأنو أخونا الصغير ...و ...و ....و ....و.....!! فقال أخو الأب الكبير ..اشرب شايك والله يسهل عليك .. والله ما معي ..بس ولا يهمك رح أشوف أمنا ( جدّة الاولاد ) .....و.....و......على جوزها .....على أخوه الوسطاني ....على أخوه الكبير ....على أمه ...على جوزها ...على أخوه الوسطاني ....على أخوه الكبير ...!!
يقال و على ذمّة الراوي ..أنا آخر واحد طلب ..من أخوه ..طلب مبلغ لا تستوعبه الآله الحاسبة ..والمشكلة ..ما زال الأبناء في طلب ..والزوجات في ليل الحنان ..والأزواج يبحثون عن الأخ الوسطاني ...والأخوان يبحثون عن كبير ...والكبير مش عارف حالو ...!!!