حكاية انتصار

سأحكي لكم حكاية ..ولكن قبل ذلك ؛ اتركوني أجلدنا قليلاً وأسخّم علينا شويّة..!! مسحتْ إسرائيلُ فينا الأرض أكثر من مرّة.. ما فيه داعي للإنكار ..وآثار تمزيق ملابسنا جرّاء مسح الأرض بنا ما زال عالقاً للآن..!!فكلما خضنا معها حرباً ؛ خسرنا الحرب لأننا لا نحب أن نكسف إسرائيل ..مسكينة إذا انكسفت ..وإحنا العرب ما إتعودنا نكسف حدا..!!
يروى أنّ جنديّاً إسرائيليّاً اسمه ( شاليت ) يقف على أحد الحدود في مرحلة اللاسلم واللاحرب إللي ( بطنجونا ) فيها ..و يضيف الراوي أبو الكلاوي ؛ أن الجندي كان كل يوم ينادي على الجندي العربي إللي اسمه ( قاهر ) في الحد الآخر : يا قاهر ..تبيع بندقيتك ..؟؟ كان الجندي قاهر يضحك ويقول في سرّه : شوفوا هالمخلِّصْ ؛ قال بدّو إيّاني أبيعو بندقيتي ..!! وكل اليوم على هالحالة ..شاليت ينادي ويعرض على قاهر شراء البندقية ..فقرف قاهر من هالشغلة وراح لقائده قائلاً : يا سيدي هاظا شاليت ابن الشلاليت ؛ كل يوم قارفني بعيشتي ..بدّو يشتري بندقيتي مني..شايفْ بالله عليك هالخسيس وين وصّلتْ الأمور معو ..؟؟!! فقال القائد : وَلَكْ هاظول جماعة الشلاليت تاعين حكي فاضي ومش تاعين حرب ..بيعو البندقيّة واضحك عليه بالسعر ..!!
استغرب الجندي قاهر من قول القائد ..فقال له : بس يا سيدي وإذا صارت الحرب عن جد ؛ شو أعمل ساعتها ..؟؟ ضحك القائد وقال : الحرب ما رح تصير ؛ وإذا صارت بندبرها ..أقولّك ؛ إذا صارت الحرب تعمل إيديك زي البندقيّة وتعمل حالك كأنك تْطُخْ : طاع طااع طاااع طاااااااع طاااااااااع ..وما حدا منتبهلَكْ وسط الميمعة ..بيعْ وتوكّلْ عَ الله ..!!
بعد أشهر قليلة اندلعت الحرب عن جد ..فما كان من الجندي قاهر إلاّ إن مدّ يديه وعملهِنْ زي البندقيّة ونازل يصرخ ويقول : : طاع طااع طاااع طاااااااع طاااااااااع.. : طاع طااع طاااع طاااااااع طاااااااااع...!! وخذوا طَعْطَعَات من ( عمكو قاهر ) لَحَدْ ما تزهقوا ..وبالصدفة ..نظر الجندي قاهر وراءه و هو يُطَعْطِعْ ..فوجد قائده ماد إيديه زي جُنحان العصفور وعامل طيّارة ويقول : فنن فننن فنننن فننننن فننننننننن .. فنن فننن فنننن فننننن فننننننننن ..!! لقد باع القائد طيارته ..وهكذا انتصرنا..يا مبروك ..تُقبل التهاني في كل العشوش العربيّة ..!!

المدينة نيوز