شو إللي حار إجماري عَ التعديل..؟؟

أكتبُ لكم ولا أعلم هل استوتْ طبخة التعديل الوزاري أم لا..؟؟ ولكنها بكل المقاييس..حرقة أعصاب..وتفويرة دم ..!! وأنا لغاية هذه اللحظة لا أعرف دوافعي للانتظار..!! فلن تصيبني لعنة الوزارة ..ولن ألبس طاقيّة الباشوات..ولا عباءة شيوخ العشائر..ولا ( قايش ) كبار العسكر..!! فلماذا أنتظر ..؟؟ وشو إللي حارّ إجماري..؟؟ فلو خرجت (زهرة ) وجاءت ( وردة ) ..لن أضل طريقي ..!! ولو حطّوا ( ماجد ) بدل ( خالد ).. سأبقى أدخِّن الميركوري الأحمر ..وسيبقى محمود الطراونة يترجّاني أطفي سيجارة ( العُطبة) ..!! ولو روّحوا (سالم ) وجابوا ( سليم ) ..أو غيّروا ( صبري ) بـِ (قهري) ..فأنا أنا ..والأردن سيمشي ..والأيّام ستعدّي ..وبرنامج الحكومة الذي أعلنته لن يتغيّر..!! طيّب.. شو إللي حارق بصلتي..ومخلّيني أستنّى لحظة بلحظة التعديل ..؟؟!!

معقول يكون السبب اعتقاداً منّي أن تعديل الحكومات هو مسلسل ..والواحد مهما كان مش هامّه ؛ إلاّ ما يشدّو مسلسل هيك وإلاّ هيك..؟؟!! بس هذا مسلسل أردني ..وأنا إلي زمان ما حطّيت على مسلسلات التلفزيون الأردني ..طبعاً العيب مني ؛ مش من التلفزيون ..؟؟ طيّب ليكون سبب شغفي وانتظاري للتعديل هو اعتقاداً منّي بأنهم سيسألوني عن رأيي بالوزراء الجُدد..ولازم أكون متحضِّر كويس لهيك فجأة..؟؟ لا لا ؛ ما أظن..لو بدهم يلفّوا على كل الناس ويسألوهم ..عمر حكومة ما تتشكّل بالأردن ..وعمر وزير ما صار وزير..ولا أمين عام..؟؟

طيب شو السبب فكرتكو..؟؟ من جهتي أتعبني السؤال ..ولا أعلم هل أتعبكم أم لا..وعشان أريّح راسي ..اخترعتُ إجابة..ضحكت بيها على حالي وصدقتها..والإجابة هي :- أنا أنتظر بالتعديل الوزاري رغم إنو ما لي مصلحة فيه ؛ لأنو أنا مفكِّر حالي شيء مهم ..عشان هيك المُهم لازم يتابع المُهم ..رغم قناعتي إنو
( على بال مين يا إللي ترقص بالتعديل ) ..!! أنا مهم..لأنني مواطن ..ولذلك سأمارس صلاحياتي كمواطن بعد انتهاء التعديل فوراً ..ومن صلاحيّاتي ..أنسى إللي راح ..وأستقبل بالأحضان إللي جاااااااااااي..!! وجيرة الله ( خبيزتكو ) تكون عندي بالغور ..!!

المدينة نيوز